Pikirane Miring, Bayine Dewe Dicemplungno Sumur

Jenenge Ngat. Ngat iku nek ditebak isok Ngatemi, Ngatmini, Ngatijah, Ngatiyem, mungkin ae yo isok Ngati-Ati. Iku nek wedok.

Nek lanang? Mestine yo Ngatimun, Ngatijan, Ngatijo, Ngatino, Ngatmani. Lha kan gak mungkin nek dadi Ngatjoni, Ngatdavid, Ngatmichel, lan liya liyane.

Wis pokoke jenenge Ngat. Gak usah dibahas dowo-dowo. Marai melu mumet. Melu miring pikirane koyok Ngat. Miring pikirane iku jenenege opo gak gendeng? Durung mesti! Ngenteni opo jare dokter jiwa sik.

Ngat, 35 tahun. Pastine Wedok. Omahe Sumberejo, Kecamatan Nglipar, Gunungkidul, Jogjakarta. Gak onok gaene, Ngat ngerti-ngerti mlaku nang sumur. Ambek nggendong anake sing isik bayek. Sumure diinceng sediluk, mari ngono bayek sing nang gendongane dicemplungno sumur. Plung!

Bar nyemplungno bayine, Ngat mlaku suantai ninggalno sumur. Koyok gak onok opo-opo blas. Ngat suantai, tonggo-tonggone sing pating njlerit. Mbebeki koyok wong kelangan bojo.

Lah iku mau mbuang sampah ta nyemplungno anak urip-urip? Padahal sumur iku jerune luwih tekan 8 meter. 

Wong-wong sipat kuping ndang-ndang golek ondo gawe mlebu nang njero sumur. Umek koyo kesetanan. Polahe, bayek iku mesti matek nek gak ndang ditulungi. 

Umeke tonggo-tonggone Ngat nggowo hasil. Bayek wedok sing dicemplungno sumur iku isok ndang kejukuk. Bar kejukuk, langsung diplayokno nang Puskesmas. Bayek wedok iku pun slamet.

AKP Sumaryo, Kapolsek Nglipar, Gunungkidul, Jumat 2 Agustus 2019 ngomong, nek Ngat kiro-kiro rodok keganggu uteke. Mergo iku Ngat kudu dikirim nang rumah sakit jiwa.

Jare Sumaryo, kedadeyan gawe umek sak kecamatan iku mau isuk jam 07.00. Jane isuk iku onok Marsilo, 40 tahun. Bojoe Ngat. Dekne pas iku umbah-umbah nang skitare sumur.

Pas iku Ngat nyedak. Tapine gak ngomong opo-opo. Ngerti-ngerti bayeke sing digendong dicemplung sumur ngono ae. Marsilo ketenggengen ndelok kelakuane bojoe. 

Gak suwe-suwe ketenggengene Marsilo ndang berok-berok nyeluki tonggone. Tonggone sakkal opyak golek ondo ndang-ndang nylametno si jabang bayi. Bayek wedok iku mau kondisine wis lemes. Sempat ngombe banyu sumur mestine. Untunge si bayek gak sampek mendelep nang dasar sumur. (*)