Bomber Kartosuro Durung Bongko, Pospam Ruame Koyo Wis Rioyo
Sampek awan iki, 4 Juni 2019, bom sing mbleset mbledakno Pospam Kartosuro update te rodok slow. Perkarane bekne onok loro, wartawane wis kesel mergo sewengi ngedur ngeliput beritae.
Keloro, polisi nggawe jurus silent. Ben sopo ae sing terlibat bom mau bengi kecekel kabeh sak endog-endogke. Ben keungkap kabeh sopo ae jaringane.
Sing jelas, Rofik Asharudin, 22 taun, warga Kampung Kranggan Kulon RT01/RW02, Desa Wirogunan, Kartosuro, Kabupaten Sukoharjo, sing nggendong bom nang wetenge sik durung bongko. (Opo kiro-kiro mergo didungakno netizen pas subuh mau yo?)
Kejet-kejete se kabare wis mari. Kritise yo wes lewat. Mergo iku, Rofik diculno tekan RS Moewardi Solo. Rofik trus digowo ambulan dikirim nang RS Bhayangkara, Semarang jam 05.30 isuk mau.
Mobil ambulan sing nggowo Rofik dikawal ceket. Sing ngawal Polisi Densus 88. "Ojok takok polisine nggowo bedil opo gak yo! Saru! Soale aku gak ngerti iku bedile merk opo. Jenise opo. Sing jelas bendile werna ireng, monconge dowo. Mungkin pelurue mbledos situk nyawamu iso ilang," guyone perawat sing nyurung kasur glindingan mlebu nang ambulan, sing wegah ditulis jenenge.
Iso ae gak ngono asline rek, jare konco-konco wartawan nggawe spekulasi dewe. Isok ae Rofik tambah kritis. Isyarat bongkoe wis nang ndukur pucuke ri. Mergo iku dekne ndang-ndang diplayokne nang RS Bhayangkara, Semarang. Sopo ngerti sik ketulung. Spekulasi ngene iki mak bendunduk onok mergo pihake RS Moewardi emoh ngekeki keterangan pers.
Beda Rofik beda Pospam Kartoruro sing mbleset gak sido mbledak dibom iku. Sampek awan iki mau, Pospam sing persis posisie koyok tusuk sate nang protelon tugu tani ruame diparani uwong. Sik reget. Akeh watu-watu. Durung diresiki. Bekne sik perlu gawe lidik polisi. Tapi wong-wong iku pak peduli, tetep nyedeki pingin ndelok.
"Opoe se sing didelok. Wong gak onok opo-opone. Gak onok sing mbledak gak. Utuh mlenuh. Kepo wong-wong iku. Ngono kok yo onok sing sempat selfie," jare Beny, sumber ngopibareng.id mau bengi. Sing mlayu tekan angkringan mergo krungu suara bom.
Suasanane memang dadi koyo wis rioyo. Padaha rioyo sik sesok. Sing selfie wis gak onok, tapi sopo ae sing lewat ngarep Pospam Kartosuro nyempatne ngerem. Gak mobil gak motor. Nolah-noleh. Nduding-nduding. Mastekno bener iku Pospame sing diteror bom Rofik.
Macet no dadine. Mesakno polisie sing ngatur lalu lintas. Semprat-semprit sampek sempritane klomoh kabeh. Huweee polisine poso iku rek... ayo majuuu ojok kathek nolah noleh. (idi)