Bom Kartosuro, Gek Maksute Opo!

Nggatheli arek-arek iku. Gawe geger sak penake dewe. Iku bom cuk, duduk mercon. Gek ngene iki wayahe der-derane mudik. Trus maksute opo se, gawe rusuh nang Solo ta?

Ngono iku gerundelane Beni, 38 taun, warga Kartosuro, omahe ngarep persis Kandang Menjangan, utowo Kopassus Kartosuro. Pas bom mbledak mak diengg deweke lagi ngangkring gak adoh saka TKP.

Beni mlayu nyedek. Angkringane ditinggal. Padahal durung bayar. Konco-koncoe nang angringan yo melu mlayu, pado nyedek. Sakjane yo rodok wedi, bek bekne onok sing mbledak maneh. Tapi terus ae nyedek, bekne onok korban. Bek bekne onok sing perlu ditulung.

Gerundelane Beni, podo karo sing diomongno Ismi Widyawati, 35 taun, warga Kartosoru, sing pas bom mbledak iku lagi katene golek lawuh gawe sahur mengko. "Lha iyo ono-ono wae to. Enak-enak arep rioyo kok yo nggolek perkoro. Ngene iki kan yo malih medeni uwong," jare Ismi, logat Solo ketok banget.

Mbasio krasa wedi, Ismi melu-melu koyo Beni. Melu nyedeki TKPne bom. Pingin ngerti dekne, onok sing matek piro.

Nyatane memang gak onok korban. Pos polisi, Pos PAM mudik, sing jarene katene dibledakno sik utuh meger-meger. Korbane ya mek situk thok. Sing nggowo bom iku dewe.

"Sokor kowe, kok ra modiarrrr pisan su!" Ndongkol atine Ismi. Mergo gegeran iku wong dodol gawe sahur nang sekitaran TKP podo milih kukut dagangan.

Gak mek Beni ambek konco-koncoe, karo Mbak Ismi sing nang TKP. Akeh temenan warga sing podo ngumpul nang sekitaran TKP. Nggrundel ngalor-ngidul. Podo duwe spekulasi dewe-dewe. Tapi intine mek situk, kok wayahe ngene onok bom, gek maksute opo se.

Hariyanto, 38 tahun, bekas karyawan koran Meteor Solo, warga Kartosuro, duwe spekulasi rodok jos. Jarene, isok ae rusuh Jakarta sing gagal total iku digeret nang Solo. Solo iku meneng-meneng akeh wong medeni. Rusuh Indonesia bolak-balik asale teka Solo. "Eling ra!" jarene.

Bar podo diusir polisi kon mulih omahe dewe-dewe, spekulasi-spekulasi campur ngarang lanjut nang angkringan. TKP trus distrerilno. Dipasangi police line. Sing ngebom, sing sik kejet-kejet durung matek digowo ambulan.

Jare wong-wong nang akringan, rusuh kuwi nek gak nglibatno Solo, gak seru blas. Kurang medeni. Gurung spektakuler. Coba deloken sejarah rusuh negara iki. Dadi gede nek diawali tekan Solo. Mei 98 misale. Opo tahun sak durunge, kan tekan solo disik. Opo iya, opo bener se? (idi)