Siola Wektu Awan Ayune Pol, Sayang Onok Andeng-Andenge

Iki Siola rek. Wektu awan. Durung patio panas. Nyuenengno nek disawang. Moto rasane adem-dem. Uapik temenan. Mrono o nek gak percaya. Wektune yah mene lho yo. Jan temenan, rupane koyok prawan.

Iki foto jepretane Bayu Krisna Aji. Diunggah nang akun instagrame. Fotografer plus pencinta bangunan-bangunan kono. Cobak deloken, sedilukkk ae. Foto iki koyok urip. Koyok isok ngomong. Koyok isok dirayu-rayu, disayang-sayang.

Tapi eman, nek jareku. Siola koyok ketemplekan andeng-andeng. Andeng-andeng kuwi nek dibahasaindonesiakno jenenge tahi lalat. Balik bahasa Jawa maneh dadi teleke laler. Gak elok kan disebut ngono?

Andeng-andeng iku nek dibahasainggrisno dadi beauty mole. Dibalekno nganggo bahasa Jawa maneh: beauty iku ayu. Mole iku moleh. Dadane wong ayu moleh. Wahhh nggatheli tambah lucu nek ngene kan?

Maksute andeng-andeng iku mau opo se? Kok ujug-ujug mak bendunduk nyebut tahi lalat yo nyebut beauty mole.

"Ngene lho! Cobak pendelikono rodok kenceng. Nang ngarep Siola persis, cuilik, nang ndukure aspal koyok onok bangunan liya, sing sak durunge gak onok nang ngisore Siola. Bangunan iku rasane nek disawang koyok andeng-andeng."

"Ooo iku ta? Iku patung perjuangan arek Suroboyo nggowo bambu runcing. Salah siji patung legendaris iku cuk. Kok iso mbok kandakno andeng-andeng. Ngawur ae koen iku. Disantap Bu Risma kapok koen!"

"Enggak lho, ngene lho. Andeng-andeng iku biasane nek nempel nang rai kan nambah ayune arek wedok kan? Aku iku muesti naksir nek onok arek wedok model ngene. Nah iki enggak. Andeng-andeng iki malah nggrai elek. Nggarai gak pantes blas. Nggarai koyok kukul malahan. Ngerti kukul gak? Kukul iku jerawat iku lho"

Iyo e. Gak pantes memang yo. Mosok guedung sak mono gedene onok patung cuilik nang ngarepe. Iyo, kok iso andeng-andeng nggarai elek. Opo iso dioperasi nek ngono iku?

"Embuh. Gak wani ngomong aku. Wedi salah. Wong awakdewe gak ngerti tata kota je... Lagian, aku wegah dilabrak trus dijancuk-jancukno." (idi)