Nggatheli Dibayar Mek Mbolosan, Kumpul Kebo Pisan, 42 PNS Pecat!

03 Jul 2019 12:16 NgopiKampung

Gak ngrumangsani blas. Wis dibayar, didadekno pegawe negri, kerja males, mbolosan pisan. Ngono sik wani kumpul kebo barang. Nggatheli, pecat ae pisan.

Kasus nggarai loro ati iki dipublikasekno mbarek BAPEK. BAPEK iku singkatan teka Badan Pertimbangan Kepegawaian. Lembaga duweke negoro. Lembaga iki saiki lagi ngetokno siung.

Wingi, BAPEK iki mastekno, mecat 42 PNS sing nggatheli. Doyan mbolos. Doyan rabi maneh. Doyan kumpul kebo. 

Putusan sidang nglanggar disiplin iku sakjane ngadili 46 PNS. Cacahe jumlah iki kecatet tekan instansi pusat mbarek daerah.

Sidang sing mimpin Ketua BAPEK dewe. Sopo se? Yo Syafruddin. Sopo iku? Yo Menteri Pendayagunaan Aparatur Negara dan Reformasi Birokrasi (MenPAN-RB). Top markotop.

Pas sidang 42 PNS sing nggatheli iku mau langsung dipecat. Gak athek nggawe hormat, alias dipecat gak hormat. Sing loro liyane kenek sanksi mudun pangkat telung tahun. Siji dipindah ambek didukno pangkate. Trus siji PNS liyane ditinjau maneh kasuse.

Kebukak nang sidang, kasus sing diadili iki nek didata gak mek perkara mbolosan, tapi yo zinah alias kumpul kebo, obat-obatan, mendeman, nyalahgunakno wewenang, sampek kasus nduwe bojo loro.

Sidang, sejene MenPAN-RB, sing nekani onok wong akeh. Koyo to, Sekretaris BAPEK sing ugo Kepala Badan Kepegawaian Negara (BKN) Bima Haria Wibisana, Sekretaris Kementerian PANRB Dwi Wahyu Atmaji, pejabat saka Kejaksaan Agung RI, Badan Intelijen Negara (BIN), Kementerian Hukum-HAM, Pengurus Korpri, terakhir BKN. (idi)

Penulis : Widi Kamidi


Bagikan artikel ini