Nek Pas Riyayan Dalane Sepine Koyo Ngene

Onok guyonon ngene nang arek-arek. Asline, wong Suroboyo iku mek pitu jumlahe. Liyane, sing telung juta plus sak glangsing, wong neka. Bahasa Indonesiane ngono iku: wong Urban. Urbanisasi. Wong ndeso podo pindah nang kutho. 

Pindahe kemungkinane yo mek sak untoro. Mergo golek pangan. Mergo golek panguripan. Mengko nek wis rioyo pada balik mulih ndeso. Nggowo sembarang kalir. Asile tekan mergawe. Asile urip dadi wong urban nang kutho gedhe.

Sing luthung nek oleh bojo wong asli Suroboyo. Mulihe gak mek nggowo asil olehe nyambut gawe, tapine yo nggowo crito sukses: nggowo anak nggowo bojo nggowo status anyar dadi wong kutho. 

Asline Suroboyo iku gak tau sepi. Nyenyet koyo foto nang nduwur iku. Kala-kala ae sepi, biasane yo mek wayah jam 01.30 sampek jam 03.00. Mari ngono suasanane kutho wis urip maneh. Aktivitase wis tangi. Trus bar subuh dalanan wis gak ketok dalan. Wis full kendaraan. Bar ngono macet.

Foto nang ndukur iku kejepret mau bengi. Antarane jam 11-an bengi. Nyeyete gak umum. Padahal iku jalan protokol paling penting nang Suroboyo. Jenenge Jalan Darmo. Lokasi motrete ngarep pas Taman Bungkul. Taman sing paling ruame nang Suroboyo. Taman sing gak tau mati 24 jam.

Sepine dalan koyo ngene iki. Mungkin memang bener jare arek-arek, nek pas riyayan ngene iki ketemon raine asli Suroboyo. Cacahe penduduke asline pancene mek pitu. Trus tumone karo ketombene sing paling akeh, hahahaha. (idi)