Halo Uber, Pesen Lontong Balap Seporsi Iso Opo Gak?

17 Jun 2019 16:57 NgopiKampung

Zaman saiki opo ae se sing gak isok. Wis, gak umum pokoke. Sembarang onok, sembarang isok. Gak onok ngomong gak iso. Mene, pesen lontong balap, garek ndulek hape, drone wis mak wesss, telung menit setengah pun saget dhahar lontong balap.

Nanging ngene ini sik durung isok nang Indonesia. Sediluk maneh kiro-kiro. Soale saiki tatarane sik diuji dijajal. 

Dikaberne, Uber sing tau nang Indonesia, nggawe ojek online, nanging gak payu, trus mutung lan cabut nang negarane, saiki lagi nggawe inovasi nyar.

Uber saiki lagi nggawe rel usaha ngirim panganan tekan ndukur omah. Maksute? Nggawe drone, lewat ndukur omah koyok mlakune motor muluk.

Uber saiki lagi uji ngirim panganan nang San Diego. Partnere McDonald's. Setelah kasil diuji dijajal, yo ambek McDonald's iku mau ngrencanakno uji jajal sing luweh ombo. 

Uber nyebut, misine ater-ater panganan  nggawe drone iku mau sakjane gawe ngurangi waktu, ben nek pesen panganan luwih cepet tekane.

Yok opo cara kerjoe yo? Jare Uber ngene, panganan sing wis digawe dicantolno nang drone trus dimaburno nggawe sistem nyar lan dipandu ambek manajemen kedirgantaraan.

Drone sing wis mabur nang ndukur omah-omah ngoleki sopir Uber Eats nang lokasi mudune drone. Mari ngono sopir menehno pesenan panganan nang tangane pelanggan.

Uber, gawe keperluan iku, katene kerja bareng uga ambek Volvo Cars. 

Trus lontong balap iku mau tekane kapan? Sing jelas yo nek wis mlebu Indonesia rek. Saik durong isok. Neng memang pingin, yo tukuo dewe sik kono. (idi)

Penulis : Widi Kamidi


Bagikan artikel ini