Bayi Mbrojol Nang Hotel Cleo Jemursari

Kok iso? Buktine iso! Jenenge ae mbrojol, mestine situasine yo gak terduga. Seje maneh nek situasi ngene iki disengojo. Ngono iku jenenge bayen. Nek bayen biasae nang rumah sakit. Opo nang omah, trus sing nangani dukun bayi.

"Sik ta... Sik ta! Iki ngomongno mbrojol ta ngomongno bayen se."

"Lha memange critane yok opo. Crita mbrojol ta crita bayen?"

"Mbrojol."

"Lha yo uwis, gek ndang crita mbrojol. Gak usah athek ngomongno bayen barang. Yok opo se critane? Onok wong kebrojolan, ngono ta?"

"Iyo. Nang hotel. Wingi jane. Tapi atiku sik pingin crita, masio rodok telat. Curhat ngono lho bro."

Wingi, pas Jakarta lagi der-deran balang-balangan watu, kayu, mercon, molotov, tibake nang Suroboyo yo keceblokan heboh. Tapi hebohe gak ngono iku. Bedo. Seje banget. Moro-moro onok mbrojol bayi nang kamar hotel. Cobak bayangno, yok opo iku panike.

Isuk. Jam 05.00 isuk uthuk-uthuk, wong-wong pada sik rembes turu, Maskut, 31 taun, wis sipat kuping gulung koming. Nelponi sopo ae. Pokoke sing iso ditelpon. Gak begitu jelas suarane nang telpon, iku megap-megap, kesusu-susu, ta menggeh-menggeh.

Maskut iki asli yo begitu jelas. Sopo asline arek iki. Tapi yo wis, gak usah dibahas. Fokus sing mbrojol iku mau.

Akhire telpone Maskut nyantol nang 112. Comamad Center. Karo kesusu Maskut lapor, nek onok wong wedok sing katene kebrojolan nang kamar Hotel Cleo Jemursari.

"Opo iki 112? Bener pak? Iki Maskut pak. Lapor. Onok wong wedok, jenenge Zita Kurnia, katene kebrojolan bayi nang Hotel Cleo Jemursari pak. Cepet pak tulungono. Kondisine wis kritis," ngono iku jare Maskut. Telpon ditrimo Awang Dani, petugas 112.

Awang Dani langsung koordinasi. Telpon kono kene. Telpon instansi sing kudu ndang mangkat ngekeki pertolongan. Wesss nguing nguing nguing ambulans langsung palyon koyo FI. Mergo sik isuk, perjalanan lancar, ambulan ndang tekan nang Hotel Cleo.

Weh komplit sing teka. Mulai Satpol PP, BPB Linmas, Damkar, Dinas Perhubungan, sampek Dinas Kehatan. Ternyata memang bener. Zita Kurnia onok nang Hotel Cleo kono iku. Kamar 808, nang lantai wolu.

Uber-uberan karo wektu, petugas-petugas iku mau ndang-ndang munggah lantai wolu. Durung sampai lawang 808, wong-wong iku podo sawang-sawang. Mlongo. Bingung. Lah kok wis ono tangise bayi? Waduh telat! Padahal mek selisih 11 menit tekae petugas karo laporane Maskut.

Ternyata memang bener. Telat. Bayine wis kadung mbrojol. Nangise buanter. Bayi lanang. Abang branang. Tali pusere sik klewer-klewer. Sementara bekas brojolan, getih karo pecahane ketuban ceceran nang endi-endi. Gak kakehan cangkem, petugas-petugas iku mau sak cepete nggledek Zita Kurnia trus ditumpakno ambulans. Digowo nang rumah sakit paling cidek, RSI Jemursari.

"Lah, dadi, Zita iku mau mbrojol, nglairno bayi lanang sing nulungi sidone sopo?"

"Embuh, gak jelas! Jare sing jaga hotel yo gak ngerti opo-opo. Ngerti-ngerti onok petugas teko, njaluk munggah kamar 808, onok wong wedok katene nglairno nang kamar hotel. Yo tak terno nang nduku."

"Nggatheli koen iki, curhat kok gak pepek blas."

"Lho ancene ngono iku critae, aku isok opo. Ngerti-ngerti Zita wis digledek nang rumah sakit gawe perawatan."

"Terus, sing ngresiki hotel bar gawe brojolan iku mau sopo?"

"Gak ngerti. Pokoke duduk aku. Lha gendeng mangan semir ta kok aku sing ngresiki. Yo mestine petugase hotel lah."

Zita Kurnia, 29 taun, dicatet petugas hotel, rupane warga Genteng Sidomukti, Suroboyo. Teko dewean nang hotel. Trus chek in. Jam chek in ne 03.30 WIB, 22 Mei 2019. Gak onok tanda-tanda apene mbrojol wetenge. Gak onok sing mencurigakan. Makane iku petugas langsung ngekeki kamar, 808 iku mau.

Gak suwe olehe chek in, kadadean geger iku mau. Zita berjuang dewe nang kamar. Wetenge mules dahsyat trus ngalirno. Untunge dekne kuat. Untunge bayine yo sehat.

Top tenan Zita iki. Perkasa luar biasa. Tapi sopo iku Maskut sing telpon 112? Bojoe? Gendakane? Durung dingerteni pasti. Sing jelas Maskut iku mau dingerteni warga Sukodadi, Sukosari, Lumajang.

"Terus, bayek lanang iku mau akhire dijeneng sopo? Opo kiro-kiro dijenengi Cleo opo Leo?"

"Yo embuhlah, terserah bapake. Memange prejenganku koyo bapak ta?"

"Lha sopo ngerti wong koen sing curhat."

"Wooo nggatheli koen iki, nuduh gak jelas faktane!" (idi)