Ban Bledos, Mobil Pick Up Numplek Ndek Lamongan

Apes tenan nasibe Sungkowo, sopir mobil pick up L300 nomer polisi S 9733 JD. Enak-enak ngangkut iwak panenan sing atene dikirim ndek Pasar Lamongan, dadak numplek jumpalitan ndek dalan.

Peristiwa iku kedadeane ndek poros Karang Langit, jalur Lamongan-Surabaya, Kecamatan Lamongan, Sabtu, 25 Mei 2019. Akibate, iwak sak Colt Pick Up numplek nang dalan-dalan. 

Yok opo ceritae sampek pick up sing ngangkut iwak laut ini numplek jumpalitan? Jare Fauzan sing dadi saksi kedadean iku, motor roda papat iki disopiri Warno Sungkowo, warga Kota Waringin Timur, Kalimantan Tengah.

Mobil nek ndek Malang diarani libom iki mlayu banter soko arah kulan nang wetan. Tujuane nyetorne iwak hasil tangkepan soko laut alias segoro menyang Pasar Lamongan.

Nah, pas lewat ngarepe Pabrik Rokok ndek Deso Karanglangit, Kecamatan Lamongan, warga sekitare dikagetno suara keras, dorrr...Bar kuwi onok suoro kecelakaan. Truk cilik jumpalitan numplek nang embong.

''Ujuk-ujuk ban ngarep lan buri mbledos,'' jare Fauzan. Mobil pick up langsung oleng nabrak median dalan, jumpalitan lan malik. Iwak sak Pikc Up tumplek nang dalan.

Untunge gak onok korban jiwa. Sopir Sungkowo slamet. Mung lecet sethithik. Nanging iwak seger sing mestine didol nang pasar tumplek nang dalan. Kocar-kacir.

Polisi sing teko nang lapangan langsung bantu ngatur dalam lan evakuasi mobil sing numplek. Warga sekitar bantu nglumpukne maneh iwak sing kocar-kacir. 

Ra butuh wektu suwe, dalan wes normal maneh. Kendaraan sing wira-wiri nang dalan iku balik lancar. Mung Sungkowo sing ndeleg-ndeleg karo ndeloki iwake lan motore sing numplek.

Mangkane to Rek, nek nduwe mobil sing teliti. Nek wis bane alus yo ceket diganti. Ojo sampek mbledos nang dalan. Garai nyusahne sopir lan wong liyo. Nek numplek ngene iki kan dadi blaen. Untung sopire sik slamet. (Rif)