Ngeblong Bangjo Bis Sugeng Rahayu Nyantap Mobil Papat
Mudik aman lancar sing digadang-gadang kabeh uwong nek ngene iki dadi gak sido. Polahe ternoda ambek Bis Sugeng Rahayu jurusan Suroboyo-Jogjakarta.
Bis sing malih rupane tekan bis lawas Sumber Kencono iku gawe polah maneh. Ngeblong lampu bangjo nang Desa Pilangsari, Kecamatan Ngrampal, arah Ngawi-Sragen.
Akibate fatal gak kaprah. Mobil papat tekan arah adep-adepan dadi korban. Duerrr santapan sak kayange suwarane koyo mercon mbledos. Dlosorrr mobil paling ngarep dewe sampek mental tekan dalan.
Ancene nggatheli bis Sugeng Rahayu nomer polisi W 7803 UY jurusan Suroboyo-Jogjakarta iku. Luwih nggatheli maneh sopire, Rahmad, 40 taun, warga Ngawi Jatim.
Yok opo gak nggatheli, bis sak mono gedene digawe balapan, uber-uberan, ambek bis liyane. Balapane ambek Bis Mira. Podo jurusane.
Jarene seksi mata nang nggon tabrakan, Sugeng Rahayu ambek Mira wis podo gendenge balapan ket tekan Palur, Karanganyar. Tekan arah kulon, Jogjakarta-Suroboyo. Salib-saliban gak duwe udel. Gak mikir slamete sing gawe dalan liyane.
Pas nang prapatan Pilangsari, bis Mira mandek. Mergo lampu banjone murup abang. Nanging tekan mburi Sugeng Rahayu nyrontong maju ambek terus ngegas pol. Marka dalan gak urus. Pokoke maju terus.
Mak wessss Mira disalip. Banjo abang gak peduli. Rahmad ngeblong koyo wong gendeng mangan semir. Padahal ngarep wis jelas onok kendaraan liyane. Jarake wis ceket pisan. Gak mungkin maneh ngeles.
Bressss monconge Sugeng Rahayu nyatap minibus. Minibuse sampek guling-guling. Trus sik nyantap maneh mobil mburine minibus, mburine maneh, trus montor roda loro situk maneh. Ngoni iku Sugeng Rahayu sing durung mandek. Iso mandek sak wise nubruk pager teras omahe Sadiran, 47 taun, warga Dusun Gersu, Desa Pilangsari.
Kedadeyan isuk mau, 1 Juni 2019, antarane jam 5 iku, kontan gawe wong sak kampung podo semburat metu omah. Pating njlerit suwarane wong njaluk tulung.
Rasane ajaib tenan. Wong suwarane tubrukan koyo mercon mbledos tapine gak onok korban nyawa. Slamet kabeh. Mek onok sing kelaran metu getihne tok.
Mobil papat sing disantap monconge bis iku mau yo gak onok sing matek. Ajaib tenan. Nanging podo rusak gak onok bentuke. Sing rusake meh total toyota avanza, minibus sing sampek guling-guling iko mau, ambek pick up jenis grand max.
Korban sing paling nemen sopir avanza. Tapi gak sampek ngancam nyawane. Trus korban sing numpak montor, sampek kecemplung kali. Evakuasi total baru rampung jam 10.00 awan mau.
AKP Dani Permana, Kasat Lantas Polres Sragen, nyebut pasti nek gak onok korban nyawa. Pas tubrukan koyo suwarane mercon mbledos kuwi bis Sugeng Rahayu nduwe 15 penumpang. Kabeh dipastekno slamet. (idi)