Dibatalno KUA, Lanange Sik Bocah Rabi Sutami Sing Wis Simbah

Jenenge Sutami. Duduk Sutomo lho yo. Nek Sutami iku wedok. Sutomo lanang. Makane Cak, makane Ning, nek njenengno anak kudu eling akhiran mburine, (i) ambek (o). Biasane i gawe arek wedok, nek o biasane lanang.

Nek banci yok opo? Engkok ae dijawab! Takon dukun bayine sik. Utowo, takon Ki Manteb Sudarsodo sik, nek banci pantesi akhiran jenenge opo.

Iki crita soal Sutami. Umure 58 tahun. Omahe Desa Jepat Lor. Kecamatan Tayu. Kabupatene melu Pati, Jawa Tengah. Umure se memang wis 58 tahun, tapi semangate urip bahagia mbok mbok mbok mbok, gawe wong sak Pati melongo. Melongone sampek koyo kebo.

Kebo nyusu gudel? Koyone yo ngono kenyataanne. Wong tuwo nyusu wong enom. Sutami nyusu Purwanto sing umure sik 19 tahun.

Lhah Purwanto kan lanang. Mosok lanang nyusoni wedok? Wis mbah-mbah pisan!

(Helehhh iki konco dewe sing crito. Kuwalik sithik kan gak mangsalah. Nggatheli koen iki, garek moco crito ae protes tok isine.)

Purwanto memang sik 19 tahun. Tapi nyaline mbarek wong wedok gak umum kencenge. Pur, ngono celukane, sing omahe Desa Bulumanis Kidul, Kecamatan Margoyoso, Pati, njaluk rabi mbarek wong tuwane. Sing dijaluk rabi yo Mbah Sutami kuwi.

Pati geger. Mbledos beritane. Dadi omongan wong sak ndayak. Koyok opo se ayune Sutami kok iso nggawe Purwanto sampek keceret-ceret ngono iku.

"Huhhh ojok salah yo, Sutami iku tahese koyok Krisdayanti," jare Gondes, koncone si Pur.

Tambah mbledos maneh beritane, Pur sing selak pingin ngentup Sutami sampek keceret-keceret iku malsokne surat izin setuju kawin sing kudu diteken wong tuwane. Pur perlu surat setuju iku mergo umure sing 19 tahun.

Heri Prasetyo, Kepala Desa Jepat Lor, manut jare Undang-Undang. Sopo ae sak durunge umur 21 tahun, nek rabi kudu oleh surat persetujuan tekan wong tuwane.

Kuwade wis ditata. Manten wis dipacaki. Fota-foto crat cret crat cret yo wis dilakoni. Ndilalah wong tuwane Purwanto teka nang kuwade. Nglabrak gak karuan akehe. Entek ngamek kurang nggolek. Njaluk kawinane anake kudu dibatalno. "Saiki ugo!" Jare Enakne Pur.

Ahmad Rodli, Kepala KUA Tayu, sing durung mingket tekan acara ijab, bengung. Sak kala mumet endase. Iki yok opo se. Nanging ndelok surat izin setuju iku palsu lan dipalsokne Pur,  Ahmad Rodli setuju, kawinan dibatalno.

Ndilalah, keluarga Sutami Krisdayanti yo setuju. Polahe ket awal yo rumongso gak sreg. Jelase, Pur sik arek. Sik bocah. Arek mburu seneng. Arek sik emak-emaken. Sutami wis pengalaman. Mosok Sutami katene nyusu Pur?

Kawinan isuk wingi iku, Kamis 4 Juli 2019, akhire bubar. Critane gak hepi ending. Tapi iku koyone sing win-win sulusion. Sing paling uapik. Pur mecucu. Membik-membik katene nangis. Sutami galau. Polahe gak sido oleh jaka thing-thing. 
      
Heri Prasetyo, Kepala Desa Jepat Lor, manut jare Undang-Undang. Sopo ae sak durunge umur 21 tahun, nek rabi kudu oleh surat persetujuan tekan wong tuwane. Nek gak onok iku, gak iso budal surat-surat liyane. Nanging, mergo Pur nekat, surat dipalsu, dekne manut KUA lan setuju kuwade manten dikukuti. (idi)